អាជ្ញាធរអាល្លឺម៉ង់ថានាឡិកាឆ្លាត វៃប្រភេទនេះអាចមានគ្រោះថ្នាក់ដល់កុមារតូច

Published Date: Sunday, November 19, 2017 03:12 PM

អាជ្ញាធរ​អាល្លឺម៉ង់ កាល​ពី​ពេល​ថ្មីៗ​នេះ​បាន​សម្រេច​ហាម​ឃាត់​មិន​ឱ្យ​មាន​ការ​លក់​ដូរ​នាឡិកាឆ្លាត​វៃ​សម្រាប់​កុមារ​តូច (Smart Watch) ដោយ​បញ្ជាក់​ថា​នាឡិកា​ទាំងអស់​នោះ​អាច​បំពាក់ប្រព័ន្ធ​សម្រាប់​តាមដាន​ក្មេងៗ​ដែល​ពាក់​វាហើយ​អាចឱ្យ​ជន​ខិលខូច​អាច​ធ្វើ​បាប​កុមារ​តូច​នោះដោយ​យថា​ហេតុ។

នាឡិកា​ឆ្លាតវៃ​ដែល​មាន​ភ្ជាប់​ជាមួយ​ស៊ីម​និង​ប្រព័ន្ធ​GPS អាច​អនុញាតិ​ឱ្យ​មាតា​បិតា​កុមារ​តូច ស្តាប់​សម្លេង​ពីបរិស្ថាន​ជុំវិញ​របស់​កូនៗ បើទោះ​បីជា​ឪពុកម្តាយ​នោះ​មិននៅ​ក្បែរ​កូនៗ​ក៏​ដោយ។ ជាង​នេះទៅ​ទៀត ឪពុកម្តាយ​កុមារ​តូច​ក៏អាច​ស្តាប់​សូម្បី​តែសម្លេង​គ្រូ​បង្រៀន​នៅ​ក្នុង​ថ្នាក់រៀន​ទៀត​ផង។

ដូច្នេះ​ហើយ​ទើប និយ័តករ​ទូរគមនាគមន៍នៃ Federal Network Agency របស់​ប្រទេស​អាល្លឺម៉ង បាន​ណែនាំ​ឱ្យឪពុក​ម្តាយ​អាណាព្យាបាល​កុមារ​ដែល​មាន​នាឡិកា​ខាងលើ​នេះ​គួរកំទេចនាឡិកា​នោះ​ចោល។

បើ​យោង​តាម​លោកJochen Homann ប្រធាន Federal Network Agency របស់​អាល្លឺម៉ង់​បានបញ្ជាក់​ថា “ការ​ដែល​ឪពុកម្តាយ​អាចតាម​ដាននិង​ស្តាប់​សម្លេង​នានា​ដែល​នៅក្បែរ​កូនៗរបស់ពួក​គេនោះ គឺជាការ​រំលោភ​សិទ្ធិឯកជន​របស់​អ្នក​ដទៃ។”

លោក​បាន​បន្ថែម​ថា “សាលារៀន​ដែល​មានកូន​សិស្ស​ពាក់នាឡិកា​ប្រភេទ​នេះ ក៏ត្រូវ​មាន​ការប្រុង​ប្រយ័ត្ន​ឱ្យ​មែន​ទែន​ផងដែរ”។​

ឪពុកម្តាយ​អាចតាមដាន​កូនៗ​បាន ជនខិលខូច​ក៏អាចតាមដាន​សកម្មភាព​របស់​កុមារ​តូចៗទាំងអស់​នោះបាន​ផង​ដែរ។ អ្នកជំនាញ​បាន​លើកឡើងថា នាឡិកា​ប្រភេទ​នេះ អាច​ធ្វើឱ្យជនទុច្ចរិត លួច​(Hack)ចូល​ទៅតាម​ដាន​និង​ទាញ​យក​ទិន្នន័យ​ផ្សេងៗ​ពី​សកម្មភាព​របស់​កុមារ​តូចៗ ហើយ​អាច​ធ្វើ​សកម្មភាព​អាក្រក់​ណាមួយ​ដោយ​នឹក​ស្មាន​មិនដល់។

កាល​ពីខែ​តុលា​កន្លង​ទៅ ក្រុមប្រឹក្សា​អ្នកប្រើប្រាស់​នៃប្រទេស​ន័រវេស បាន​រកឃើញ​ថា នាឡិកា​ប្រភេទនេះ មានបំពាក់​ទៅដោយ​ស៊ីមកាត និង​ប្រព័ន្ធGPS ដែល​អាច​ទទួល​និង​បញ្ជូនទិន្នន័យ​បាន​ដោយ​មិន​ចាំបាច់​មានការ​ព្រម​ព្រៀង​ពី​ម្ចាស់​ខ្លួន។

យ៉ាងណា​ក៏ដោយ គេនៅ​មិនទាន់​ដឹងពីមូល​ហេតុ​ជាក់លាក់​ដែលនៅ​ពីក្រោយ​ការសម្រេច​ចិត្តរបស់​អាជ្ញាធរ​អាល្លឺម៉ង​ពាក់ព័ន្ធ​នឹងការបិទ​មិនឱ្យមាន​លក់នាឡិកា​ប្រភេទនេះ​​នៅ​ឡើយនោះទេ។

សូម​បញ្ជាក់​ដែរថា កាល​ពីពេល​កន្លងទៅ អាជ្ញាធរ​អាល្លឺម៉ង់​ក៏ធ្លាប់​បិទ​មិន​ឱ្យមាន​ការ​លក់ដូរ​នូវ​ប្រភេទ​តុក្កតា​ម្យ៉ាង​ឈ្មោះ​ថា My Friend Cayla​ របស់​អាមេរិច​ផង​ដែរ។ តុក្កតា​ប្រភេទ​នេះមាន​បំពាក់ទៅ​ដោយ​ប្រព័ន្ធ​ស្រូប​សម្លេង ជាមួយ​បច្ចេកវិទ្យា​Bloutooth អាច​ភ្ជាប់​ជាមួយ​នឹង​ទូរស័ព្ទ​ស្មាតហ្វូន​ ហើយ​អាច​និយាយ​ឆ្លើយឆ្លង​ជាមួយ​កុមារ​នោះ​បាន​ទៀត​ផង៕

ប្រភពៈ BBC

ប្រែសម្រួលដោយ៖ KoungY Phone Shop