ក្រុមតារាចម្រៀងដ៏ល្បីល្បាញ BLACKPINK ឬ BLΛƆKPIИK បានបង្ហាញមុខលើកដំបូងនៅក្នុងឆ្នាំ 2016 ដោយស្ថិតនៅផលិតកម្ម YG Entertainment ហើយក៏ចាប់ផ្ដើមទទួលបាន ប្រជាប្រិយភាពខ្លាំង តាំងពីពេលនោះរហូតមកដល់បច្ចុប្បន្ននេះ។ បទចម្រៀងកំពូលៗរបស់ក្រុមកូរ៉េមួយនេះ ត្រូវបានគេស្គាល់ច្រើនមានដូចជា “Kill This Love” និង “Ddu-Du-Ddu-Du” ព្រមទាំងធ្លាប់ជាប់នៅលើតារាង Billboard Hot 100 និង Billboard 200 ថែមទៀតផង។ ឥឡូវនេះ សមាជិកក្រុម Jennie បានធ្វើការដាក់បង្ហាញនូវជម្រើស Edition ផ្ទាល់ខ្លួនថ្មីមួយ ដែលមានស្រោបពណ៌ក្រហមដ៏ស្រស់ស្អាត សម្រាប់ម៉ូឌែល Galaxy S20+ និងកាស Galaxy Buds+ តែម្ដង។

ចំណែកឯជម្រើស Exclusive Edition ថ្មីនេះ ត្រូវបានដាក់ឈ្មោះហៅថា Jennie Red ដោយឧបករណ៍ឆ្លាតវៃទាំងពីរ នឹងនាំយកនូវពណ៌ក្រហមសុទ្ធតែម្ដង ដើម្បីផ្ដល់ជូនអ្នកស្រឡាញ់ចូលចិត្តពណ៌មួយនេះ ឬក៏ជាអ្នកគាំទ្រកញ្ញា Jennie ជាពិសេសផងដែរ។ គួរតែបញ្ជាក់ផងថា សម្រាប់ទីផ្សារក្នុងស្រុកកូរ៉េខាងត្បូង ជម្រើសពណ៌ក្រហមនេះ នឹងត្រូវបានដាក់ឈ្មោះថា Jennie Red នេះ ដោយឡែកនៅលើទីផ្សារសកលដទៃទៀត អាចនឹងដាក់ឈ្មោះវាថាជា Aura Red ដូចម៉ូឌែល Galaxy Note10 Series កន្លងទៅអញ្ចឹង។ តាមពិតទៅ នេះមិនមែនលើកដំបូងនោះទេ ដែលក្រុមហ៊ុន Samsung បានចាប់ដៃគូគ្នាជាមួយនឹងក្រុម BLΛƆKPIИK ដោយរួមបញ្ចូលទាំងម៉ូឌែល Galaxy A80 BLΛƆKPIИK Edition និងការផ្សាព្វផ្សាយពីម៉ូឌែល Galaxy A51/A71 កាលពីពេលថ្មីៗនេះថែមទៀត។ ប្រិយមិត្តអ្នកអានទាំងអស់គ្នា អាចចូលទស្សនាវីដេអូខាងក្រោមបាន ដែលជាការដាក់បង្ហាញពីម៉ូឌែល Galaxy S20+ និង Galaxy Buds+ នៅលើជម្រើស Jennie Red Edition ជាពិសេសនេះ។

ក្រៅពីក្រុម BLΛƆKPIИK ហើយ ក្រុមហ៊ុន Samsung ក៏កំពុងតែសហការគ្នាជាមួយក្រុម BTS ថែមទៀត ទៅលើកផ្នែកផ្សព្វផ្សាយពាណិជ្ជកម្មសម្រាប់ Galaxy S20 Series និង Galaxy Z Flip នេះបើយោងទៅតាមរបាយការណ៍ ដែលបានចុះផ្សាយពីមុនមក។ ចុះអ្នកទាំងអស់គ្នាវិញនោះ តើយល់ឃើញយ៉ាងណាដែរ ចំពោះជម្រើសពណ៌ Jennie Red សម្រាប់ Galaxy S20+ និង Galaxy Buds+ ទាំងនេះ?